Kategori: Erlas blog

Hér er hann svo. Nýjasti fjölskyldumeðlimurinn. Litli sæti Múggí, sem viðeigandi er líka mikill prumpuköttur. Uss uss uss. Og ég sem hafði svarið og sárt við lagt að engin dýr með hár eða ham eða slím eða fjaðrir mundu fá að búa hér í húsinu mínu. En svona er óliver slyngur…. 🙂

Annars er húsmóðirin útivinnandi lúin þessa dagana. Ég bara skil ekki hvernig fólk skapar einhvern harmonískan hversdag með börn og vinnu og alles og fjármál og nesti og muna íþróttaföt og fundur hér og fundur þar og líka….. þetta og hitt. Bara næ þvi ekki. Hver sem hefur töfralausnina má gjarnan gefa sig fram 🙂

En allaveganna er allt hér í nokkurn vegin góðum gír. Máni er sæll og glaður og er að stækka mikið þessa dagana. Hann er eitthvað svo skynsamur og hægt að treysta honum, að það er bara sætt. Óliver er enn sama kaoskúlan. Í gær tók hann vatnsglas og fór með það. Hann kom til baka með það tómt. Hvað gerðirðu við vatnið Óliver? Ég hellti því í pabba skó, komið og sjáið….. Og enn er hann mikil mömmulús. Við töluðum við ömmu og afa á skypinu á mánudaginn og svo í gærmorgun vildi hann fara upp og vekja þau…. fannst mikið svindl að þau væru ekki hér uppi. Tölvutæknin…. Röskva er yndisleg en er aftur komin í smá vælugír á milli 17 og 19, mömmunni til ama. En þetta er allt saman tímabil sem gengur yfir :).

Mér og Kim gengur vel í vinnunni og þannig er allt í gúddí gír. Eftir rúma vikur er haustfrí. þá förum við til Holbæk og svo kemur Ragnheiður. Húrra. Svo kemur Ingvar Freyr, svo amma Bogga og afi Ísbjörn og svo Inga og Jóndi…. svo það er alveg frábært.

Jæja ég ætla að fara að sofa, þó klukkan sé rúmlega 21. Veit ekki hvað annað ég á að gera í stöðunni.

og til hamingju með daginn Rósa sósa :), vonandi verður dekrað við þig.

Góð helgi næstum að baki. Ungarnir sofnaðir. Nestið tilbúið og frúin getur bjargað sér fyrir horn í vinnunni á morgun án mikils undirbúnings :). Við erum heppin. Með húsið, með fólkið, með börnin okkar, með vinnuna. Á föstudaginn fór ég aðeins út að drekka öl með vinnufélugum. Huggulegt og gaman, og við gátum stutt hvort annað í því að fá okkur einn enn þó svo að augnlokin væru orðin ansi þung. Hverjum datt í hug að reyna að halda sér vakandi á föstudagkvöldi :). Í gær kom Alma (dóttir Ane vinkonu, jafngömul Mána og þau hafa þekkst alla ævi) í pössun, svo það hefur verið leikið mikið  hér um helgina. Kim skrapp til Odense i gærkvöldi og af því að strætobílstjórar eru í verkfalli komst hann fyrst heim í morgun. Svo ég var hér í góðum barnafans. Við skruppum svo í hjólatúr í dag med ungana og bökuðum vöfflur þegar Ane og Andreas komu að sækja Ölmu seinni partinn. Góð helgi. En mig langar heim. Mig langar í mat til mömmu og pabba. Mig langar upp á Akranes og hitta flokkinn stóra þar og fylgjast með öllum frændunum í leik. Mig langar að knúsa Dag. Mig langar að sækja Arnór Breka og fara með hann á róló. Mig langar að heimsækja ömmu á Skjól. Mig langar í sund. Mig langar að skila börnunum mínum í nokkra klukkutíma á Vesturgötuna, í Hellulandið eða Ekrusmárann. Mig langar að vera með fólki sem þekkir mig. Ég er svo svakalega þreytt á að vera ný. Það er svo lýjandi. Að vera alltaf með fólki, sem er mjög indælt og skemmtilegt en maður þekkist ekki. Auðvitað ekki, við erum bara búin að vera hér í 2,5 mánuð. Hlutirnir taka tíma. Mig langar að heimsækja Hrund og fara með Henný á bar 🙂 Og mig langar að hitta öll systkini mín. Ég er með stóra feita heimþrá. En svoleiðis er það. Og eins og mamma segir alltaf, þá sagði Ingunn Jónasar alltaf “guð minn góður hvað það væri leiðinlegt ef maður saknaði einskis eða enginn saknaði manns”. Mig langar að spjalla við Maríellu í frímínútunum og mig langar fíflast á íslensku. Mig langar í heimsókn til ömmu og afa og fara í göngutúr með ömmu. Æi ekki meira væl.

Í næstu viku förum við hjónin til Álaborgar á tónleika. Á sjálfan stevie wonder, svo af hverju er ég að væla. 

Elsku amma Ingibjörg. Innilega til hamingju með afmælið. Vonandi hefur dagurinn verið huggulegur á Spáni. Við söknum þín mikið og hlökkum til að hittast aftur. Njótið seinni helmings gönguferðarinnar. Kær kveðja frá okkur 5 á Mellemvej.

Hmmm fór yfir til nágrannanna til að biðja þau um að senda Mána heim fyrir 19:45 í kvöld og þegar ég kem segir mamman á heimilinu mér að hún og dóttirin (6 ára) séu ósammála um eitt mál og hvort ég geti svarað einni spurningu. Dóttirin heldur því fram að Kim sé stóri bróðir hans Mána. Að hann geti bara ómögulega verið pabbi hans, hans dansar og allt mögulegt, voru rökin. Mamma hennar reyndi eins og hún gat en dóttirin gaf sig ekki. Þar sem ég stend í dyragættinni finnst mér ég hafa trompið í hendi mér og spyr “finnst þér líklegt að ég sé mamma hans Kim?” og held að þannig geti stúlkan (mikil vinkona mín) áttað sig á hlutunum en hún svara blákalt “JÁ”. En þegar ég er búin að útskýra fjölskyldu okkar fyrir henni og að Kim sé mjög skrýtin og ekki eins og annað fólk, þá samþykkir hún loksins.

Svo Kim er rosa kátur með þennan misskilning… ég aftur á móti???? á ég 4 börn?…. er ég orðin kelling….

… já og nei nei nei NEI ÉG ER FYNDIN OG FJÖRUG OG SVAKALEGA UNG. Eða þannig “mamma hans Kim, ég get svo svarið það”.  🙂

• Erla á hús
• Erla er gift
• Erla á 3 börn
• Erla er kennari
• Erla á garð
• Erla er “í áskrift” í fitness centri
• Erla er búin að ráða barnapíu, sem hefur passað tvisvar
• Erla var á fundi
• Erla “surfer” ekki á netinu, en notar bara meil, netbanka og smá blogg
• Erla les auglýsingabæklinga á klósettinu
• Erla fer oftast snemma að sofa
• Erla getur næstum ekki verið vakandi eftir miðnætti
• Erla er alltaf að flýta sér
• Erlu finnst hún aldrei gera hlutina nógu vel
• Erla gengur með 3 hringa dags daglega
• Erla þarf að tjékka google meil til að vita hvað Kim er að gera

Fleira væntanlegt.

Við sendum okkar bestu óskir á afmælisdaginn og vonum að það verði dekrað við þig. Vildum að við gætum kíkt við í garðinn og kaffi. Hlökkum til að fá ykkur í heimsókn. Kærar kveðjur frá Mána skólastrák, Óliver vinnumanni, Röskvu ráðskonu, Erlu mömmulitlu og Kim kúnstner.